Kupata Makazi mapya nchini Marekani wakati wa Janga la COVID-19

Haki na Majukumu Yako

Unachangia pakubwa katika kujikinga pamoja na familia yako. Haya hapa ni mambo kadhaa unayoweza kufanya:

Kuwa mtulivu: Jikinge pamoja na wapendwa wako kwa kunawa mikono yenu mara kwa mara kwa sabuni na maji kwa angalau sekunde 20, haswa baada ya kuwa mahali pa umma au baada ya kusafisha pua, kukohoa au kupiga chafya. Epuka kugusa macho, pua, na mdomo wako kwa mikono isiyooshwa. Epuka watu ambao ni wagonjwa. Watu wengi ambao wanapata COVID-19 wana dalili zisizo kali na wanaweza kupona wakiwa nyumbani. Fuata ushauri kutoka kwa wataalam wa matibabu, idara ya afya ya umma katika eneo ulipo, na Shirika la Kupata Makazi Mapya.

Endelea kujulishwa: Maelezo na mwongozo zinaweza kubadilika haraka wakati wa janga la COVID-19. Una jukumu la kuendelea kujulishwa kuhusu hali hiyo na kufuata mwongozo. Idara za afya ya umma katika mji au jimbo lako zinatoa maelezo ya kutegemewa zaidi.

Kuwa na Mpango: Tayarisha nyumba yako na uwe na mpango endapo wewe au mtu yeyote ambaye unaishi naye atapata ugonjwa.

Unda orodha ya dawa, vifaa vya nyumbani, na vifaa vingine ambavyo watu katika nyumba yako hutumia mara kwa mara. Hakikisha una vifaa vya kutosha nyumbani ili usiishiwe. Ikiwezekana, pata dawa nyingi zilizoagizwa na daktari. Ikiwa haujui jinsi ya kupiga simu kwa daktari, wasiliana na Shirika lako la Kupata Makazi Mapya kwa usaidizi.

Nunua chakula kisichoharibika ili uweze kupunguza safari za kwenda nje dukani.

Amua ni nani anayeweza kusaidia ikiwa wewe au mtu fulani katika familia yako anakuwa mgonjwa. Omba mtu mwingine wa familia au mtu katika jamii kukusaidia kupata chakula na vifaa vingine muhimu. Unda orodha ya mashirika ya eneo unayoweza kuwasiliana nao iwapo unahitaji ufikiaji wa maelezo, huduma za afya, usaidizi na rasilimali.

Kuwa mwangalifu kwa maelezo yasiyo sahihi: Maelezo sahihi kutoka kwa serikali ya eneo ulipo yanaweza kukosa kupatikana katika lugha yako. Ikiwa hauzungumzi Kiingereza, pata mtu wa kukutafsiria maelezo ya eneo ulipo, kama vile Shirika la Kupata Makazi Mapya. Mitandao ya kijamii, au marafiki na familia katika maeneo mengine, wanaweza kukosa kuwa na maelezo sahihi au yanayofaa. Fahamu kuwa kuna uvumi na hadithi za uwongo kuhusu virusi na jinsi ya kujikinga au kujiponya mwenyewe. Unapaswa kupata ushauri wa matibabu tu kutoka kwa daktari au wataalamu wengine wa huduma ya afya.

Epuka ulaghai: Jihadhari na ulaghai unaohusiana na mikurupuko. Ulaghai ulioripotiwa ni pamoja na uuzaji wa vifaa vya upimaji wa nyumbani, tiba bandia, sera za bima na mengineyo. Ikiwa utapokea simu au ujumbe wa maandishi kutoka kwa mtu usiyemjua au kukaribiwa na mtu usiyemfahamu akikuomba maelezo yako ya benki, nambari ya bima ya jamii, au maelezo mengine binafsi, usitoe maelezo hayo na wasiliana na Shirika lako la Kupata Makazi Mapya kwa usaidizi.

Piga simu kabla ya kwenda kupata huduma ya matibabu: Kabla ya kwenda kwenye ofisi ya daktari au chumba cha dharura, piga simu kabla ikiwa unakabiliwa na dalili za COVID-19 kama vile homa, kikohozi au ugumu wa kupumua. Watakueleza hatua za kufanya. Ikiwa haujui jinsi ya kupiga simu kwa daktari, wasiliana na Shirika lako la Kupata Makazi mapya kwa usaidizi. Ikiwa wewe au mpendwa wako ana dalili kali kama vile matatizo ya kupumua, piga simu 911 au nenda kwenye chumba cha dharura hospitalini. Mjulishe mfanyakazi wa suala lako, haraka iwezekanavyo.

Omba huduma za ukalimani, ikiwa inahitajika: Una haki ya kupata huduma za ukalimani. Waeleze wafanyakazi wa hospitali au kliniki kwamba unahitaji mkalimani wakati wa kuweka miadi au unapowasili kwa huduma ya dharura.