ဖိစီးမှုကို စီမံထိန်းချုပ်ခြင်းနှင့် ကိုင်တွယ်ဖြေရှင်းခြင်း

ဖိစီးမှု ဆိုတာ ဘာလဲ။

ဖိစီးမှုသည် ကောင်းမွန်သော သို့မဟုတ် မကောင်းမွန်သော သို့မဟုတ် နှစ်မျိုးစလုံးရောစပ်နေသော ခံစားချက် ဖြစ်စေနိုင်သည်။ ဥပမာ။ မင်္ဂလာဆောင်တစ်ခုအတွက် စီစဉ်ချိန် သို့မဟုတ် အားလပ်ရက်တွင် မိသားစုများနှင့် တွေ့ဆုံချိန်တို့၌ ကောင်းမွန်သည့် စိတ်ဖိစီးမှုကို ခံစားရနိုင်သည်။ တစ်ခါတစ်ရံတွင် ဖိစီးမှုလွန်ကဲလာခြင်းမျိုးလည်း ဖြစ်နိုင်ပြီး အပြောင်းအလဲအသစ်ကို စီမံထိန်းချုပ်ရန် သို့မဟုတ် ကိုင်တွယ်ဖြေရှင်းရန် ခက်ခဲလာနိုင်သည်။

အရွယ်ရောက်ပြီးသူများ၏ ဖိစီးမှုကို စီမံရာ၌ ကူညီပေးနိုင်သည့် ခံနိုင်ရည်မြှင့်တင်နည်းများ

ခံနိုင်ရည်မြှင့်တင်နည်းများသည် ဖိစီးမှုကို စီမံရန်နှင့် ၎င်းတို့၏ စိတ်ခံစားမှု ကြံ့ခိုင်ရန်အတွက် နည်းလမ်းများ ဖြစ်သည်။ သာမန် ခံနိုင်ရည် မြှင့်တင်နည်းများတွင် အောက်ပါတို့ ပါဝင်သည်-

ပုံမှန်လုပ်ဆောင်မှုကို ဆက်လက်ပြုလုပ်ခြင်း- ပုံမှန်လုပ်ဆောင်မှုများသည် သင့်အား လုံခြုံကြောင်းနှင့် စွမ်းဆောင်နိုင်ကြောင်း ခံစားရစေသည်။ ပုံမှန်လုပ်ဆောင်မှုတွင် နေ့စဉ်ပုံမှန်အချိန်၌ အိပ်ရာထခြင်း၊ အိပ်ရာဝင်ခြင်းကဲ့သို့သော လုပ်ရိုးလုပ်စဉ်များကို တူညီသောအချိန် သို့မဟုတ် နေ့စဉ် သို့မဟုတ် အပတ်စဉ်တို့၌ လုပ်ဆောင်ခြင်းပါဝင်သည်။

အိပ်ရေးဝအောင် အိပ်ခြင်း- အိပ်ရေးဝခြင်းဖြင့် သင့်ဦးနှောက်လုပ်ဆောင်ချက်များ ကောင်းမွန်စေပြီး သင်က တစ်စုံတစ်ခုကို အာရုံစိုက်ရန်၊ စီမံခန့်ခွဲရန်၊ ဆုံးဖြတ်ချက်ချရန် ကူညီပေးသည်။ အိပ်ချိန်ပုံမှန်ထားခြင်း၊ ကျန်းမာသော အစားအစာများကို စားခြင်း၊ အိပ်ချိန်မတိုင်မီ ကာဖင်းဓာတ်ပါသော အစားအသောက်များကို ရှောင်ခြင်းတို့ကို ပုံမှန်ပြုလုပ်ခြင်းဖြင့် နှစ်ခြိုက်စွာ အိပ်စက်နိုင်သည်။

သင့်ခန္ဓာကိုယ်ကို လှုပ်ရှားခြင်း- တစ်နေ့လျှင် အနည်းဆုံး ၁၅ မိနစ်ခန့် လေ့ကျင့်ခန်းလုပ်ခြင်း သို့မဟုတ် သင့် ခန္ဓာကိုယ်ကို လှုပ်ရှားခြင်းဖြင့် ဖိစီးမှုကို လျှော့ချနိုင်ပြီး ကောင်းမွန်စွာ အိပ်စက်နိုင်ရန် ကူညီပေးသဖြင့် သင့် စိတ်ခံစားချက်များကို ပိုမိုကောင်းမွန်စေသည်။ လမ်းလျှောက်ခြင်း၊ ကိုယ်လက်အညောင်းဆန့်ခြင်း၊ ကကုန်ခြင်းတို့သည် သင့်ခန္ဓာကိုယ် လှုပ်ရှားနိုင်သည့် နည်းလမ်းတချို့ ဖြစ်သည်။

သင့်ယဉ်ကျေးမှု ဓလေ့ထုံးစံများကို လုပ်ဆောင်ခြင်း- သင့်ယဉ်ကျေးမှုနှင့် ချိတ်ဆက်နေခြင်းက ကာလရှည်ကြာသည့် ဖိစီးမှုကို စီမံနိုင်ပြီး ခံနိုင်ရည်အားမြင့်လာရန် ကူညီပေးနိုင်သည်။ သင့်ရိုးရာအစားအစာများကို ချက်ပြုတ်ခြင်း၊ ရိုးရာဓလေ့တူသူများနှင့် ချိတ်ဆက်ခြင်း၊ ယုံကြည်ကိုးကွယ်ရာ ဘာသာတရားကို ကျင့်ကြံခြင်း၊ ရိုးရာဂီတများ နားထောင်ခြင်းတို့သည် သင့် ရိုးရာယဉ်ကျေးမှု ဓလေ့ထုံးစံများကို အလေးအနက်ပြု လုပ်ဆောင်နည်း တချို့ ဖြစ်သည်။

ဤနည်းလမ်းများကို အသုံးပြုခြင်းအားဖြင့် သင်၏ အတွေးအမြင်များ ပိုကောင်းလာစေပြီး ဆုံးဖြတ်ချက်များကိုလည်း ပိုမိုကောင်းမွန်စွာ ချမှတ်နိုင်ကာ မိမိဘဝနှင့် မိသားစု၏ လိုအပ်ချက်များကို စီမံဆောင်ရွက် နိုင်ပါမည်။ တစ်နေ့တွင် ငါးမိနစ်မျှ လုပ်ဆောင်ခြင်းသည်ပင်လျှင် သင့် ကျန်းမာရေးနှင့် စိတ်ခံစားချက် ကြံ့ခိုင်ရေးတို့အတွက် ကြီးမားသည့် အပြောင်းအလဲ ဖြစ်စေနိုင်သည်။

ရှင်းလင်းချက်-:

IRC သည် အောက်ပါအဖွဲ့အစည်းများမှ ယှဉ်ပြိုင်လျှောက်ထားချက် မှတစ်ဆင့် ငွေကြေးထောက်ပံ့မှု ရရှိပါသည်။ ကျန်းမာရေးနှင့် လူမှုဖူလုံရေးဝန်ဆောင်မှုဆိုင်ရာ အမေရိကန် ဝန်ကြီးဌာန၊ ကလေးများနှင့် မိသားစုများအတွက် စီမံအုပ်ချုပ်ရေးအဖွဲ့၊ ထောက်ပံ့ကြေး #90RB0052 နှင့် ထောက်ပံ့ကြေး #90RB0053။ အစီအစဉ်ကို ပြည်ထောင်စု ရန်ပုံငွေများမှ ၁၀၀% ထောက်ပံ့ပါသည်။ ဤမှတ်တမ်းပါ အကြောင်းအချက်များသည် ရေးသားသူများ၏ တာဝန်သာဖြစ်ပြီး ကျန်းမာရေးနှင့် လူမှုဖူလုံရေး ဝန်ဆောင်မှုဆိုင်ရာ အမေရိကန် ဝန်ကြီးဌာန၊ ကလေးများနှင့် မိသားစုအတွက် စီမံအုပ်ချုပ်ရေးအဖွဲ့၏ တရားဝင် အမြင် သဘောထားများကို ကိုယ်စားပြုသည်ဟု မဆိုလိုပါ။